قالب پرشین بلاگ

اولدوز ساياراق گؤزله ميشم هر گئجه ياري         گئج گلمه ده دير يار،يئنه اؤلموش گئجه ياري

گوزلر آسيلي، يوخ نه قارالتي، نه ده بير سس       باتميش قولاغيم گؤر نه دؤشورمكده دي داري

بير قوش آييغام سؤيليه ره ك، گاهدان اييلده ر      گاهدان اؤنودا  يئل ديه لاي  لاي هوش  آپاري

ياتميش هامي بير اللاه اوياقدير داها بير من         مندن آشاغي  كيمسه  يوخ  اوندان دا  يوخاري

قورخوم بودو يار گلميه بيردن ياريلا صبح          باغريم  ياريلار،  صبحوم آچيلما،  سني تاري

دان اولدوزو ايسترچيخا،گوزلر يالواري چيخما      اؤ  چيخماسادا اولدوزومون  يوخدو  چيخاري

گلمز، تانيرام بختيمي ، ايندي آغارار صبح          قاش بئيله  آغارديقجا،  داها  باشدا  آغاري

عشقين كي  قراريندا  وفا اولمياجاقميش              بيلمم كي طبيعت نيه  قويموش  بو  قراري

سانكي خوروزون سؤن باني خنچردي سؤخولدو   سينه مده اؤره ك  وارسا، كسيب قيردي داماري

ريشخنديله قيرجاندي سحر، سؤيله دي: دورما       جان قورخوسو وار،هر كيم اتوزموش بو قماري

اولدوم  قارا  گون آيريلالي  اؤ ساري  تئلدن         بونجا  قارا  گونلردي  ائدن  رنگيمي  ساري

گؤز ياشلاري هر يئردن آخارسا، مني توشلار       دريايه  باخار بللي دي  چايلارين  آخاري  

از بس مني ياپراق كيمي هيجرانلا سارالديپ        باخسان اؤزؤنه سانكي قيزيل گولدو قيزاري

محراب شفقده اؤزومي سجده ده گوردوم              قان ايچره غميم يوخ اوزوم اولسون سنه ساري

عشقي واريدي شهريارين گوللو چيچكلي         افسوس قارا يئل اسدي خزان اولدو باهاري

سنسيز، اي گول، منيم خوش گذرانيم  يوخدور        سن كي يوخسان، ائله بيل، جيسمده جانيم يوخدور

عشق  پروانه سييم،  غم  اودونا   تابيم   وار         خسته  بولبول   كيمه  هر  لحظه   فغانيم  يوخدور

بو يامان گونده منيم  بيرجه اوميديم، سنسن          سنسيز  هئچ  بير  كسه  عالمده   گمانيم   يوخدور

زولفونه باغلي اولاندان بري مجنون كيمييم         ائله   سرگشته يم،  هئچ يئرده   مكانيم     يوخدور

صبر و آراميمي  الدن غم – هيجران  آليپ         بيرده  غم  چكمگه   جيسميمده   توانيم    يوخدور

حاضيرام  جانيمي  عشقينده  فدا  ائيله مگه         قسم   اول   جانانا،  بير   ذره   يالانيم     يوخدور

واحدم، آتش– حسرت بورويوب دؤوروبريم        يانيرام،   حاليما   بير   قلبي   يانانيم     يوخدور

گلمه سه اوستومـه يـاريـم مـن اؤلنـدن سـونـرا
تـوُتمـاز آرام مـزاريـم مـن اؤلنـدن ســونــرا

.
هانسي گولچهره ني مشهور جهان ائيله مـه ديـم
قوي دئسين شانلي دياريم من اؤلندن سونرا؟!

.
گؤردوم هر گؤزه لي شؤق ايله تصوير ائلـه ديـم
سن ده خاطيرلا، نيگاريم، من اؤلندن سـونـرا

.
وطنه، خالقا چاليشديم، ابدي خدمـت ائـدم
سولماسين باغ و باهاريم مـن اؤلنـدن سـونـرا

.
عاشيقم صنعته، شعره و گـؤزه ل مـوسيقـي يـه
ديللن، اي سؤ گيلي تاريم، من اؤلندن سـونـرا

.
واحدم، قالدي سؤزوم دهرده بيـر دورّ كيمـي
ياشايـار ائلـده شعـاريـم مـن اؤلنـدن سـونـرا

گئتمه اي يار مني هيجرينده پريشان ائلمه

اولرم من آيريليقدان مني بي جان ائلمه

سن گئدرسن كوسرم منده بوتون عالمه يار

گر سئويرسن مني، بو گؤزلري گيريان ائلمه

آيريليب گئتسن اگر، بيل سئوينر دوشمانيميز

نه اولار يالواريرام دوشماني خندان ائلمه

سنسيزليك يار باغي بوستاني منه زيندان ائدر

گوزليم گئتمه منه دونياني زيندان ائلمه

سئويرم يار، سنسيز اولماز، بيليرم سنده سئويرسن

نه اولار سن بو گوزل سئوگيني هيجران ائلمه

قلبيمين سولطاني تك وارليغي بيردانه ياريم

آيريلما گئتمه گينن كونلومو سن قان ائلمه

دونن آخشام چاغي سن‌سيز مني آغلاتدي ياغيش

ياديما سالدي سني مطلبينه چاتدي ياغيش

كوچه‌ لر اولدو گؤزومده يئنه بير آرپا چايي

مني سن‌سيز نئجه نيسگيل سئلينه آتدي ياغيش

اودو سؤندورمه سواينان قايداسي‌دير آمما دونن

كؤزرن گؤيلومو ياغديقجا آلوولاتدي ياغيش

دامجي دامجي سنه لاي لاي دئدي قوينومدا منيم

نه دئيم بلكه سني كورپه يه اوخشاتدي ياغيش

او قدر مستيديم هئچ بيلمديم آخير نه زامان

سينم اوسته ساريلان تئل‌لري ايسلاتدي ياغيش

سورا بيلديم آپاريب قورد گئچينين شنگولوسون

سني مندن آليب آنجاق مني آلداتدي ياغيش...