قالب پرشین بلاگ

دونن آخشام چاغي سن‌سيز مني آغلاتدي ياغيش

ياديما سالدي سني مطلبينه چاتدي ياغيش

كوچه‌ لر اولدو گؤزومده يئنه بير آرپا چايي

مني سن‌سيز نئجه نيسگيل سئلينه آتدي ياغيش

اودو سؤندورمه سواينان قايداسي‌دير آمما دونن

كؤزرن گؤيلومو ياغديقجا آلوولاتدي ياغيش

دامجي دامجي سنه لاي لاي دئدي قوينومدا منيم

نه دئيم بلكه سني كورپه يه اوخشاتدي ياغيش

او قدر مستيديم هئچ بيلمديم آخير نه زامان

سينم اوسته ساريلان تئل‌لري ايسلاتدي ياغيش

سورا بيلديم آپاريب قورد گئچينين شنگولوسون

سني مندن آليب آنجاق مني آلداتدي ياغيش...